Cebuano News: Andanar, nangapod-apod og security handbook sa Bohol media


GITUNOL NI SEC ANDANAR ang kopya sa media handbook on security sa iyang labing bag-o nga pagtanda sa Bohol. (ECB)

TAGBILARAN CITY, Dec. 3 (PIA)–Isip parte sa paningkamot sa pagseguro sa pag-panalipod sa media, si Presidential Communications Operations Office (PCOO) Kalihim Martin Andanar nangapod-apod niining bag-o lang, sa kopya sa Handbook on Personal Security Measures for Media Practitioners ngadto sa mga miyembro sa Bohol media.

Ang maong handbook nga inandam sa Presidential Task Force on Media Security (PTFoMS), nagtinguha sa paghatag sa mga media practitioners og mga pasidaan aron pagseguro sa ilang seguridad atol sa ilang coverage.

“Usa sa mga proyekto sa task force ang pag-umol sa Handbook on Personal Security Measures for Media Practitioners.

Unsa na? Kini mao ang mga do’s and don’ts: How to protect yourself and your family,” matud pa ni Andanar sa iyang pakighinabi sa mga miyembro sa Bohol media niadtong Nobyembre 27 sa Café Dolores sa Bohol Tropics Resort, ning syudad sa Tagbilaran.

READ:  Tagalog News: Proyekto ng QMWD, magdadagdag ng supply ng tubig sa Lucena, Tayabas at Pagbilao

Tinguha ni Andanar nga mangapod-apod sa maong handbook ngadto sa tanang media sa tibuok nasod aron malikay sila sa peligro.

Gibutyag sa Kalihim nga didto siya sa Maguindanao og nangapod-apod sa handbook ngadto sa Maguindanaoan press.

Didto usab siya sa GenSan (General Santos City) sa niaging semana og nanghatag sa maong handbook ngadto sa mga media sa Soccsksargen. Susamang handbook usab ang iyang gipanghatag sa Cebu pinaagi sa National Press Club ning bag-o lang.

Ang PTFoMS namugna pinaagi sa Administration Order No. 01 nga gilagdaan ni Presidente Rodrigo Duterte niadtong Oktubre 2016 aron masulbad ang pagpatay ug harassment sa mga media sa nasod.

Gipangunahan kini sa Department of Justice (DOJ), co-chaired sa PCOO, kauban sa Department of National Defense (DND), Department of the Interior and Local Government (DILG), Office of the Solicitor General (OSG), Presidential Human Rights Committee (PHRC), Armed Forces of the Philippines (AFP), Philippine National Police (PNP) ug National Bureau of Investigation (NBI), isip mga miyembro. (ecb/PIA7-Bohol)

Source: PIA Feed