Cebuano News: Bohol, niduyog sa nasud pagsaulog sa ika-120 nga Adlaw sa Kaugalingnan


Gipasundayag sa usa ka bahan sa mananayaw ang paghubad sa pagkabayani pinaagi sa pagpakita sa bandila. (ecb/PIA-7/Bohol)

TAGBILARAN CITY, June 12 (PIA)–Niduyog ang lalawigan sa Bohol sa tibuok nasud sa pagsaulog sa ika-120 nga Adlaw sa Kaugalingnan, Martes sa buntag, Hunyo 12.

Ang mga opisyal sa kagamhanang probinsiyal nga gipangunahan ni Gob. Edgar Chatto ug kaatbang nga mga opisyal sa syudad sa Tagbilaran sa pagpanguna ni Bise Mayor Jose Antonio Veloso nitambong una og misa sa St. Joseph Cathedral isip pagbukas sa mga kalihokan.

Gisunod dayon human sa misa ang dungan nga pagbagting sa mga kampana ug pagpatinggog sa mga serbato ug sirena.

Human niini, gisunod dayon sa Plaza Rizal ang pag-isa sa bandila, paghalad og mga bulak sa bantayog ni Dr. Jose Rizal ug ang pagpahigayon sa seremonya sa 21 gun salute.

Sa gipahigayong commemorative program, si Chatto nanawagan sa mga Bol-anon sa paghiusa ug huptan ang inambitan nga panlantaw alang sa lalawigan sa Bohol. 

Samtang si Veloso sa iyang bahin nanawagan sa pagpahimos sa kaabtik sa kabataan aron pagseguro sa padayong kausaban ug pakigbisog sa pagkab-ot sa kagawasan. 

READ:  ESPH-DOH intensifies effort to eliminate TB in Eastern Samar  

Atol usab sa maong programa, gipasidunggan ug gihatagan og special award ang giisip nga bayaning Bol-anon nga si Wenifredo B. Maquindang. 

Lumad nga taga lungsod sa Loboc si Maquindang nga usa  ka taxi driver sa Las Vegas sa Estados Unidos nga nakasalbar og 7 katawo sa nahitabong pagpamusil didto niadtong Oktubre 2017. 

Samtang gipasidunggan usab ang TARSIER 117 sa nadawat niining Quality Summit Award for Excellence and Innovation didto sa New York sa niaging semana.

Gitapos ang kalihokan sa Adlaw sa Kaugalingnan sa pag-presentar sa 21 ka kandidata sa Miss Bohol 2018. (ecb/PIA7-Bohol)

 

Source: PIA Feed