Cebuano News: Dagyaw Town Hall Meeting himoon sa Sugbo, Bohol media gidapit

TAGBILARAN CITY, Bohol, June 26 (PIA)—Agi og pagpangandam alang sa ika upat nga State of the Nation Address (SONA) ni Presidente Rodrigo Duterte, usa  ka town hall meeting ang ipahigayon sa Sugbo.

Kini aron kahatagan og kahigayunan ang mga katawhan sa pagpatin-aw sa mga hisgutanan nga angayan matuki sa Presidente ug kaaksyonan sa mga natungdan nga ahensya ang ilang mga concerns.

Ang town hall meeting nga pasiugdahan sa Participatory Governance Cluster nga gilangkoban sa Department of Interior and Local Government, Budget and Management, Presidential Communications Operations Office uban sa suporta sa Philippine Information Agency, paga ilhon nga Dagyaw: Open Government and Participatory Governance Town Hall meetings 2019.

Gawas nga kini maoy gibuksan nga lugar diin ang ordinaryo nga molupyo makapadangat sa iyang mga hunahuna ug magtukbil sa mga suliran sa iyang komunidad, tumong usab sa Dagyaw, nga sa Binol-anon pa, hungos-tinabangay, ang pagpasabut usab ug pagpadangat sa maayong bansay sa pagdumala sa kagamhanan ug mga kausaban nga gisugdan sa Administrasyon ni Duterte.

Aduna usab mahitabo nga one stop-shop alang sa frontline service providers sa serbisyo sa goberno.

READ:  New PRO-XI chief vows to pursue fight against drugs, police misfits and criminality

Ang Dagyaw, nga mahitabo sa Hulyo 9, 2019 sa may alas 8:00 ngadto sa alas 12 sa udto, adto sa Social Hall sa Kapitolyo Probinsyal sa Sugbo.

Alang sa sector sa media sa Bohol, duha  ka slot ang gigahin sa mga tigpasiugda aron linawas nga makatambong ug marepresentahan ang Bohol.

Agi og pagsuporta sa pag-apil sa 2 ka sakop sa media, mohatag ang PCOO og lugar nga katulgan alang sa overnight nga accommodations sa gabii sa Hulyo 8, apan ang motambong na ang mogasto sa iyang pletehan ug pagkaon samtang tua didto.

Sa mga sakop sa media nga motambong, ang PIA Bohol maoy mokolekta sa ngalan ug dinhi usab sa nahisgutan nga buhatan ipaagi ang mga instruksyon sa mosalmot.

Sa sakop sa media nga interesado, ang arrangement subay sa first come first served basis.

Alang sa dugang pangutana, tawag sa PIA Bohol sa 09395690432 ug 5018554. (rahc/PIA-7/Bohol)

 

Source: PIA Feed