Cebuano News: Lahi sa gituohan, inflation di lang TRAIN kina-ingnan


TAGBILARAN CITY, Bohol, September 11 (PIA)—Samtang daghan ang nagtuo nga ang balaod sa Tax Reform Acceleration for Inclusion (TRAIN) mao’y kina-ingnan sa nagmahal nga paliton, gipakita sa Department of Finance (DOF) nga dyutay ra ang gikatampo niini sa kasamtangang nasinati nga inflation.

Didto sa gilusad nga The Presser, didto sa Malakanyang, si Assistant secretary for Strategy, Economics, ug Results Group (SERG) sa DOF nga si Antonio Joselito Lambino II, mipasabot nga sukad nga napasaka ang TRAIN sa Enero, 2017, sa buwan sa Agosto, 0.40 lamang sa 6.40 nga pagtaas sa inflation ang tungod sa TRAIN.

Buot ipasabot nga ang kanhi usa  ka putos nga paliton nga nagpresyo og Php100, sa 6.40 porsyento nga inflation, kini nagpresyo na og Php106.40 karon.

Gipasabot usab sa DOF pinaagi ni Lambino nga niadtong Enero 2017, P53.37 pa ang bili sa usa ka baril nga oil, samtang 49.74 pa lamang ang bili sa dolyar.  

Sa miaging Agosto 2018, minglobo ang bili sa international markets sa lana og ming-abot na sa $71.90 ang baril sa lana samtang ang dolyar, katumbas na sa 53.30.

READ:  Abrenean PWDs exhibit artworks

Taliwala niining tanan, matud ni Lambino nga sa kinatibuk-an nga Php 11.4 nga pagsaka sa matag litro sa krudo, Php2.80 pesos o 25 porsyento niini, ang TRAIN nakaingon.

Pagtaas sa presyo sa palit sa lana ug ang pag-ubos sa bili sa peso maoy dako nga rason nga nasinati ang inflation karon, butyag ni DOF Asec Antonio Joselito Lambino II. 

“Kon ikaw mipalit og gasolina nga may Php9.80 na kada litro nga usbaw sa presyo niini, kinatibuk-an nga Php3.00 pesos or 30 porsyento niini nga ang TRAIN maoy naka-ingon,” dugang niya.

Hinuon, gitumbok ni Lambino didto sa Presser nga mas nakatampo pa gani ang pagtanyag sa goberno sa benepisyo sa mga katawhan kapanginabuhi-an.

Sa iyang gisaysay, usa sa mga nakaingon sa inflation mao ang pagdaghan sa katawhan nga nahatagan sa conditional ug unconditional cash transfer.

Matud niya, mihatag ang goberno og Php32.5 billion matag buwan nga nagdugang sa dyutay nga kita sa katawhan.

Niini, dul-an sa 90 porsyento, gipamalit dayon nga samtang ang supply sa palitonon dili ikasarang sa mamalitay, nga nakaguba sa ekonomikanhong kaligdong. (rahc/PIA -7/Bohol)

Source: PIA Feed