Cebuano News: Mga ahensya sa gobyerno gimanduang suportaan ang Nat’l Crime Prevention Prog

TAGBILARAN CITY, Sept. 30 (PIA) — Gimanduan sa Malakanyang ang tanang ahensya sa gobyerno nga suportaan ang 2019 National Crime Prevention Program.

Sa gilagdaang Memorandum Circular 66 ni Executive Secretary Salvador Medialdea, nakalatid nga ubos sa Republic Act 6975 o ang Department of Interior and Local Government Act of 1990, gimanduan ang National Police Commission (NAPOLCOM) nga magrekomendar og crime prevention program.

Gimugna sa NAPOLCOM ang 2019 National Crime Prevention Program (NCPP) aron makahimo og mga lakang ug estratehiya batok sa krimen, ug aron maseguro ang seguridad ug kahusay ug kalinaw.

Ubos sa maong memorandum circular, ang pondo alang sa pag-implementar sa programa kuhaon gikan sa kasamtangang budget sa hingtungdang ahensya.

Nakalatid usab nga aron maseguro ang kalampusan sa 2019 NCPP, kinahanglang motabang ang tanang buhatan sa gobyerno aron masulbad ang krimen sa nasod.

Apil usab sa gitahasang motabang ang mga lokal nga kagamhanan.

Gilagdaan ni Medialdea ang maong kamanduan niadtong Setyembre 23, 2019. (ecb/PIA7-Bohol)

READ:  TESDA trainees earn skills for jobs, skills upgrading

 

Source: PIA Feed