Cebuano News: P7.7 B commodity invest plan sa balanghoy papundohan sa RDC

TAGBILARAN CITY, July 12 (PIA)—Giduso na sa Regional Development Council sa Central Visayas ang hangyo sa Bohol nga kahatagan og dako nga pundo aron ibubo pagpatambok sa industriya sa balanghoy o kamoteng kahoy dinhi.

Ang hangyo sa  pundo pag-ugmad sa balanghoy, mokabat sa P7.7 bilyones nga molanat sa tulo ka tuig, ang giduso usab sa RDC ngadto sa Department of Agriculture (DA) human kini ikasukip sa Regional Development Investment Plan.

Ang pundo nga gikinahanglan, segun pa sa secretariat sa RDC, nagrepresentar sa tumbok nga mga proyekto ug programa sa pag-asnat sa ekonomikanhong kahimtang sa katawhan sa Central Visayas. 

Matod sa RDC, ang Provincial Commodity Investment Plan (PCIP), nihaum lang usab sa mga tumong sa Regional Development Plan sa pagpalapad ug pagpadaghan sa mga kahigayonan nga makapamuhunan sa pagpanguma. 

Kahinumduman nga niadto pang Disyembre 11, 2017 sa tigum sa Bohol Provincial Development Council una nga giduso sa PDC ang PCIP alang sa balanghoy sa sugyot nga iapil na kini sa Regional Development investment Plan (RDIP) aron mapahatan og pundo.

READ:  N. Vizcaya town bares nutri month activities

Segun pa sa Bohol PDC, ang balanghoy usa sa mga 10 ka commodities nga gitumbok nga unang hatagan og pagtagad sa Philippine Rural Development Project (PRDP) sa DA, proyekto nga gipundohan usab sa World Bank ug gipatuman sa DA.  

Ang PCIP sa balanghoy naglangkob sa tulo ka tuig nga sugyot-tinabangay sa kagamhanan nga Probinsyal ug sa DA ug niini, maglatag sa mga angayan nga tabang nga ikatag ngadto sa nagkadaiya nga value chain sa balanghoy. 

Kini, matod pa, mao’y mahimo nga basihanan ug kapasikaran sa PRDP alang sa mga proyektong pundohan niini aron tubagon ang mga panginahanglan sa mga nagkadaiyang naglihok sa pagproseso sa bolanghoy. (rahc/PIA-7/Bohol)

Source: PIA Feed