Cebuano News: PSSLAI nagbutang ug satellite Office sa Dipolog


DIPOLOG CITY, Zamboanga del Norte, Sept. 29 (PIA) — Sulbad na ang panginahanglang-pinansyal sa mga sakop sa kapulisan, Bureau of Fire Protection (BFP) ug Bureau of Jail Management and Penology dinhi sa lalawigan sa Zamboanga del Norte ug kanait nga mga lalawigan.

Kini human nga ang Public Safety Savings and Loan Association, Inc., mibutang di pa lang dugay ug satellite office sa Barangay Minaog, ning dakbayan sa Dipolog.

Sa gipahigayong blessing ug inagurasyon sa bag-ong buhatan sa PSSLAI niadtong Septyembre 26, 2018 nga gitambungan sa mga kadagkuan niini ug mga opisyales usab sa PNP, BFP, BJMP dinhi sa lalawigan, gipahayag ni PSSLAI Chairman ug Chief Executive Officer Ret. Police Director Atty. Lucas M. Managuelod nga nahukman nila  ang pagbutang ug satellite office dinhi human nila nakita ang dakong panginahanglan niini.

Gipasabot usab ni Managuelod ang mga pamaagi sa pagpahimulos sa maong pautang nga ubos lang kaayo ang interes, walay nakatagong mga bayronon ug ang abot niini makuha lang usab dayon sulod sa pipila ka gutlo.

Sa samang higayon, giawhag ni Managuelod ang mga sakop sa PNP,BFP, ug BJMP  nga magpamembro sa PSSLAI aron makapahimulos sa pautang ug benepisyo niini, isip membro.

Nasayran nga sa wa pa matukod kining maong buhatan dinhi sa Dipolog, ang mga pulis, bombero ug mga personahe sa BJMP kinahanglan pang moadto sa dakbayan sa Pagadian o kaha Zamboanga alang sa maong katuyoan.

READ:  NorMin fisher folks attend labor standards, OSH compliance orientation

Gumikan sa ilang gibating kalipay, tagsa-tagsang mipabati sa ilang pasalamat ang mga kadagkuan sa PNP, BFP ug BJMP ning lalawigan nga sila si ZNPPO Acting Provincial Director PSSupt. Michael B. Macapagal, Provincial Fire Marshall FCI Elias Baguio ug Dipolog City Jail Warden PSI Egbert I. Nagrampa sa pagkatukod niining maong buhatan dinhi sa dakbayan ug mipasalig ug suporta alang sa kalambuan niini.

Sa iyang bahin, gihangyo gilayon ni Nagrampa si Ms. Mae Carpitanos nga mao ang gitugyanan sa operasyon sa PSSLAI-Dipolog nga mopahigayon ug miting sa Dipolog City Jail nga nahimutang sa Barangay Lower Dicayas aron pagpasabot sa iyang mga kauban kabahin niini.

Gitapos ang maong kalihokan, pinaagi sa usa ka panihapon ug fellowship uban sa mga opisyales sa PSSLAI ug mga bisita didto sa Ariana Hotel, Airport Drive, Dipolog.

Alang sa dugang kasayuran, giawhagan ang mga intresado nga bisitahon ang PSSLAI Satellite Office, Dipolog-Oroquieta National Road, Minaog (beside the Barangay Hall), Dipolog City ug pangitaon lamang sa Jeanette o kaha tawagan sa Cellphone #0998-960-8843 (EDT/ATR/PIA9-Zamboanga del Norte)

 

 

Source: PIA Feed