Cebuano News: SSS miawhag sa mga may wala na kabayri nga huwam: apply sa LRP  

 

TAGBILARAN CITY, July 12 (PIA)—Giawhag sa Social Security System (SSS) kadtong mga sakop nga may mga huwam nga wala na kabay-ri nga dili palabyon ang kahigayunan nga malimpyo og balik ang nindot nga record sa SSS.

Pinaagi sa SSS Loan Restructuring Program (LRP), mahimo na nga papason sa SSS ang penalidad nga natangag sa panahon nga ang utang wala kabayri, pahayag sa SSS.

Pinaagi sa SSS LRP, malimpyo na ang mga wala kabayri nga huwam gikan sa principal ngadto na sa interes, ug tangtangon na ang natigum nga mga multa sa wala pagbayad niini, segun pa sa mga opisyal sa SSS.

Dugang niana, pinaagi sa LRP, mahimo nga ikabalik ang maayong record isip membro sa SSS ug  ang labing nindot, mahimo na usab nga matagamtam ang kinatibuk-an nga benepisyo ug pribilihiyo sa SSS, dugang nila.

Ang LRP, gibuksan niadtong Abril 2 ug molanat pa hangtud lamang sa Oktubre 1, 2018, mao nga kinahanglan nga dili na maglangan, sugyot sa SSS.

Sa ilang gitanyag nga loan restructuring, mikabat na sa P1.31B ang nahipos sa SSS sulod sa tulo ka buwan pa nga pagpatuman sa LRP. 

Kini matod pa ni SSS President ug Chief Executive Officer Emmanuel F. Dooc, ang programa mi-apaw na sa P3.35 bilyones nga bili sa mga multa gikan sa 200,960 ka mga mi-apply sa ilang LRP gikan sa Abril hangtud sa katapusan sa Hunyo.

Dugang ni Dooc nga sa paglusad sa sa LRP niadtong Abril, ilang gitantya nga mga 200,000 ka sakop nga may huwam ang ilang kaserbisyohan.

Apan, sa tulo ka buwan pa lamang, 250,000 na ka sakop ang naalagaran, ug may lain nga tulo pa ka buwan ang mapaabut hangtud taposon na sa SSS ang tanyag. 

READ:  OPAPP offers cows for Eid'l Adha celeb of IDPs

Mao nga giwahag ni Dooc ang mga sakop nga may wa kabayri nga huwam nga mopailawom sa programa sa dili pa ang Oktubre 1, tungod kay namatud-an na sa kadaghanan, nga dako ang gikatabang sa programa pagpagaan sa gibati sa mga sakop.

Maapil sa LRP ang mga wa kabayri nga Salary Loan, Emergency Loan, Educational Loan (old), Study Now Pay Later Plan, Voc-Tech Loans, Y2K Loans ug Investments Incentive Loan.

Aron makapailawom sa LRP, kinahanglang ang loan nakaabut nag 6 ka buwan nga wa kabayri gikan sa Abril 2, ug  ang magpa-LRP nanimuyo sa lugar nga naa sa kalamidad sa panahon sa pagloan. 

Hinuon, kadtong mga sakop nga nahatagan nag final benefit claim sa unang LRP ug kadtong mga sakop nga may salaud nga pagpangilad sa SSS, dili na madawat sa programa. 

Aron makapailawom niining LRP nga may penalty condonation, ang mga sakop nga may huwam kinahanglang mosubmitir sa gi-fill out nga application form, Letter of Authority (LOA) kon ang mopasa lain nga tawo ug dili mismo ang may huwam, ug valid nga identification cards.

Gani, matod ni Dooc, modawat ang SSS bisan og scanned nga kopya sa LOA nga gipadala sa email bisan pag dili ang may huwam ang mo-apply.

Hinuon, ang authorized representatives kinahanglan nga moduso sa kopya sa email request sa sakop nga may huwam, scanned nga copya sa LOA ug duha  ka ID sa may huwam. 

“Kinahanglan usab ang tin-aw nga kopya sa email nga nagpakita sa address sa may huwam ug sa address sa gisugo sa pag-apply,” pahinumdom ni Dooc. (rahc/PIA-7/Bohol)

 

Source: PIA Feed