Gawad pangwika pinangunahan ng KWF


LUNGSOD PASAY, Agosto 30 (PIA) – Pinangunahan ng Komisyon sa Wikang Filipino (KWF) at ng Sentrong Pangkultura ng Filipinas (CCP) noong Martes, Agosto 28 ang Pammadayaw: Araw ng Gawad 2018.

Itinanghal bilang Kampeon ng Wika si Dr. Lucena P. Samson (gitna), iskolar ng wikang Kapampangan sa katatapos na Pammadayaw. Kasama sa larawan sina Ginoong Virgilio Almario, Pambansang Alagad ng Sining at Tagapangulo ng Komisyon sa Wikang Filipino at Komisyoner Purificacion De Lima ng KWF.

Ang Pammadayaw, isang programa sa pagpaparangal, ay bahagi ng pagdiriwang ng Buwan ng Wikang Pambansa sa Filipinas tuwing Agosto. Ang aktibidad ay magtatampok ng mga gawad pangwika at ng mga nagwagi sa mga timpalak na itinaguyod ng KWF. 

Ang ilan sa mga gawad na ito ay ang Kampeon ng Wika, Dangal ng Wika, Gawad KWF sa Sanaysay, at Selyo ng Kahusayan sa Wika at Kultura.

Sa kanyang mensahe, inilahad ni Ginoong Virgilio Almario, Pambansang Alagad ng Sining at Tagapangulo ng Komisyon sa Wikang Filipino, ang mga matagumpay na aktibidad ng KWF kaugnay ng pagpapayabong ng Wikang Filipino at ng pagdiriwang ng Buwan ng Wika.

Ayon kay Almario, kasama rin ang kaniyang mithiin na makabuo ng gramatikong Filipino na magsasangkap ng iba’t ibang katutubong wika.

Samantala, tumanggap ng  Dangal ng Wika 2018 Pamanang Pangkultura, pinakamataas na pagkilalang iginagawad ng KWF,  si Maria Stanyukovich, isang antrolopogong Ruso at tagapagtaguyod ng Araling Filipinas.

Si Stanyukovich na siya ring panauhing pandangal sa okasyon ay nagbigay ng tampok na panayan hinggil sa estado ng wikang Filipino sa Russia.

Sinabi niyang mauugat ang pag-aaral ng wikang Filipino sa Russia sa mga naunang Rusong iskolar at lingguwista gaya nina Peter Pallas (ika-18 siglo) Peter Dobell (ika-19 siglo), at nina Sergey Bulich, Eugene Palivanov, at Roy Franklin Barton (ika-20 siglo).  Sa kasalukuyan, ipinagpapatuloy pa rin ng Moscow State University at Saint Petersburg University ang tradisyon ng pagtuturo at pag-aaral ng mayamang wika at kultura ng Filipinas.

Si Stanyukovich, na kasalukuyang puno ng Departamento ng Australia, Oceania, at Indonesia ng Kunstkamera Museum sa Saint Petersburg, ay nagsagawa ng puspusang pananaliksik sa mga epiko ng Filipinas. Ang pinakakomprehensibong saliksik niya ay hinggil sa Hudhud ng mga Ifugaw.

READ:  Unveiling of Davao Norte drug treatment plan to mark International Day on Drug Abuse

Iginawad rin ang Dangal ng Wika sa Dulaang UP, ang opisyal na grupong panteatro ng Unibersidad ng Pilipinas. Simula sa pagkakatatag nito noong 1970s, pinangunahan ng Dulaang UP ang mga pagsasalin at adaptasyon sa wika at kulturang Filipino ng mga klasikong dula ng daigdig.

Itinanghal naman na Kampeon ng Wika si Dr. Lucena P. Samson, iskolar ng wikang Kapampangan.

Malaki ang naging ambag ni Samson sa katutubong wika at mga wikain ng Filipinas. Kasama sa kaniyang mga proyekto ang opisyal na ortograpiyang Kapampangan at antolohiya ng panitikang Kapampangan upang tiyakin ang kasiglahan ng wikang Kapampangan para sa susunod pang mga henerasyon.

Ginawaran din ng Selyo sa Kahusayan sa Wika at Kultura ang Pampahalaang Unibersidad ng Bukidnon, Pampahalaang Unibersidad ng Ifugao, Pampahalaang Unibersidad ng Mariano Marcos, Pampahalaang Kolehiyo ng Occidental Mindoro, at Pampamahalaang Kolehiyo sa Teknolohiya ng Aurora  para sa kanilang mga programa sa pangangalaga ng mga katutubong wika ng kanilang rehiyon at sa pagpapalaganap ng wikang Filipino.

Ang mang-aawit ng kundiman na si Lara Maigue at kompositor na si Ramoncito Carpio ay nagtanghal ng isang bagong kundiman na pinamagatang “Minsan Lang,” – isa sa mga finalist sa katatapos na NCCA Konsiyerto ng Kundiman 2018.

Bilang pagwawakas sa gabi, nagkaroon ng rap performance tampok ang “Sugo” at “May Pag-asa” ng fliptop rapper na si BLKD.  Ang pangkulturang pagtatanghal ay naglalayong itampok ang husay ng wikang Filipino na umakma sa iba’t ibang uri ng musika. (PIA-NCR)

 

 

 

 

 

 

 

 

 

 

Source: PIA Feed