Hiligaynon News: 15 ka kabanwahanan nalab-ot ang target sa donasyon sang dugo


SYUDAD SANG ROXAS, Capiz, Disyembre 28 (PIA) — Nalab-ot sang 15 ka mga kabanwahanan sa probinsya ang ila tagsa ka mga target nga yunit sang dugo karon nga tuig 2018 nga isa ka porsiyento sang populasyon sang natungdan nga lokal nga panguluhan pinaagi sa serye sang bloodletting nga hilikuton.

Ini ang mga kabanwahanan sang Cuartero, Dao, Dumalag, Dumarao, Ivisan, Jamindan, Maayon, Mambusao, Panay, Panit-an, Pilar, Pontevedra, Pres. Roxas, Sapi-an kag Sigma base sa rekord sang Philippine Red Cross (PRC) – Capiz Chapter.

Samtang ginpahayag ni Ketch Armiza nga donor recruitment officer sang PRC – Capiz nga ang “blood units” nga nakolekta sang mga banwa sang Dumalag kag Jamindan ang katumbas sang tatlo ka porsiyento sang tagsa nila ka populasyon.

Apang ang banwa sang Tapaz kag Roxas City ang wala makalab-ot sang ila “blood units” target para sa karon nga tuig.

Magluwas sa mga kabanwahanan ukon lokal nga mga panguluhan, ang mass bloodletting sa probinsya ang ginapatigayon man sang mga kabaranggayan, eskwelahan, relihiyoso kag socio-civic nga mga grupo, media, mga nasyonal nga ahensya sang gobyerno kag madamo nga iban pa.

READ:  NMIS to LGUs: Hire sanitary inspectors

Ang gintingob nga kampanya sa boluntaryo nga pagdonar sang dugo ang nagabulig sa probinsya nga malab-ot man sini ang probinsyal nga lebel nga target humalin pa sang tuig 2015.

Nahibaluan nga sang tuig 2017, naglab-ot sa 11,315 ka mga blood units ang natipon nga dugo sa probinsya pinaagi sa mga mass blood donations nga nangin rason agud kilalahon ang Capiz bilang top performer sang rehiyon sa blood donation. (LTP/AAL/PIA Capiz)

Source: PIA Feed