Hiligaynon News: 3 ka mga bagyo nalampuwasan sang mga Capiznon sang 2018


SYUDAD SANG ROXAS, Capiz, Enero 11 (PIA) – Tatlo sa 21 ka mga bagyo nga nagsulod sa Philippine Area of Responsibility nga direkta nga nag-apekto sa probinsya pinaagi sa mabaskog nga hangin, ulan, baha, pagkatup-ay sang duta kag pagsuspindi sang klase ang nalampuwasan sang mga Capiznon sang tuig 2018.

Base sa rekord sang PAGASA, ginsug-alaw sang mga Capiznon ang tuig 2018 pinaagi sa pagbinaha sang madamo nga kabanwahanan bangud sang tropical depression Agaton sadtong Enero 1 tubtob 3 nga nagpaidalom sa probinsya sa Tropical Cyclone Warning Signal No. 1.

Matandaan nga kapin isa ka libo nga pamilya nga inabot sang tubig baha ang nag-evacuate sa New Year sang 2018.

Samtang nagdeklara ang madamo nga mga kabanwahanan sang “state of calamity” bangud sang epekto sang Agaton kag nagpaabot naman sang bulig ang lokal nga panguluhan sang probinsya sa mga apektado sang bagyo.

Kasunod nga nag-apekto sa probinsya amo ang tropical depression Samuel nagbutang man sa Capiz  sa Tropical Cyclone Warning Signal No. 1 kag nangin kabangdanan sang suspension sang mga klase sa Roxas City kag mga kabanwahanan.

Ang bagyo Samuel ang nagpabaha sang walo ka kabaranggayan sa banwa sang Sigma kag kabangdanan sang pag-evacuate sang 28 ka mga pamilya sa banwa sang Sapi-an bilang preparasyon batuk sa pagkatup-ay sang duta sa ila nga lugar.

READ:  Army commander to public: ‘Avoid spreading unverified information’

Ginpahayag ni Imelda Ofalla nga hepe sang PAGASA – Roxas City nga ang pag-inulan nga dala sang tropical depression Usman sadtong Disyembre 25 tubtob 29 ang nag-resulta sa pagbaha sang 87 ka mga kabaranggayan sa Roxas City kag 13 ka mga kabanwahanan.

Ang bagyo Usman ang nangin kabangdanan man sang landslide ukon pagkatup-ay sang duta sa Brgy. San Vicente sa banwa sang Jamindan nga gilayon man nga gin-respondihan sang lokal nga panguluhan sang Jamindan agud mga maagyan sang mga motorista ang apektado nga dalan.

Subongman ang baha nga gintuga sang pag-inulan bangud kay Usman ang nangin kabangdanan sang pag-evacuate sang 174 ka mga pamilya nga nagbalik man sa ila tagsa ka mga panimalay inoras antes ang New Year’s Eve.

Nahibaluan nga wala sang na-rekord nga nagkalamatay bangud sang tatlo ka mga bagyo nga nag-apekto sa probinsya base sa rekord sang Aksyon Tabang ukon Provincial Disaster Risk Reduction and Management Office sa nasambit nga tuig. (AAL/PIA Capiz) 

Source: PIA Feed