Hiligaynon News: DOST naghatag bulig sa mga mangingisda, mangunguma

SYUDAD SANG ROXAS, Capiz, Oktubre 12 (PIA) – Naglab-ot sa Php1,048,000.00 nga balor sang proyekto kaangot sa Community Empowerment pinaagi sa Science and Technology nga programa ang ginhatag sang Department of Science and Technology para sa mga mangingisda sa banwa sang Pres. Roxas kag mga mangunguma sa banwa sang Cuartero.

Ang nasambit nga bulig pinansyal ang nangin kabahin sang mga serbisyo kag proyekto sang gobyerno nga ginpaambit sa mga pumoluyo kaangot sa “Biyaya ng Pagbabago” nga highlight naman sang pagtililipon subongman pagsumpa sang mga opisyal sang Kilusan ng Pagbabago sa probinsya sadtong Setyembre 29 diri sa Roxas City.

Ginpahayag ni Gerbe Dellava nga direktor sang DOST – Capiz nga pagabuligan sang DOST ang mga mangingisda sa baybayon nga kabaranggayan sang Pres. Roxas pinaagi sa proyekto nga nagabalor Php518,000.00 agud matudluan sila sang panibag-o nga teknolohiya sa pagpatubo sang talaba.

Ang nasambit nga bulig pinansyal ang may dugang pa nga offline digital library para sa mga estudyante, complimentary food para sa mga kulang sa timbang kag taas nga mga kabataan kag water level subongman rain gauge nga mga aparatus.

READ:  ROOM ASSIGNMENTS: August 2018 Guidance Counselors Board Exam

Samtang naghatag man sang Php530,000.00 nga bulig pinansyal ang DOST para sa mga mangunguma sang Cuartero agud gamiton para sa pandayan nga proyekto nga ginalauman magasabat sa kinahanglanon sang mga mangunguma para sa kagamitan kapareho sang garab, kayog, sanduko kag madamu nga iban pa.

Ang Cuartero ang pagataan man sang offline digital library kag complimentary food para sa undernourished nga mga kabataan.

Matandaan nga ang Cuartero kag walo ka iban pa nga mga kabanwahanan ang nagbaton man sang Flood Early Warning System nga ginhatag sang DOST sadtong Agosto. (AAL/PIA Capiz)

Source: PIA Feed