Hiligaynon News: DPWH nagtukod P438M by-pass roads sa Iloilo

 

SYUDAD SANG ILOILO, Hulyo 13 (PIA6) – – Gina-implementar na karon sang Department of Public Works and Highways 6 (DPWH 6) ang pag-obra sang tatlo ka mga by-pass road nga magahatag sang alternatibo nga alagyan, magapahaganhagan sang trapiko kag magabuhin sang oras sang pagbiyahe nagikan sa siyudad sang Iloilo padulong sa norte nga bahin sang probinsiya kag kaprobinsyahanan sang Aklan kag Capiz, kag pabalik.

Nagabalor sa P438.881 milyon ang mga by-pass road nga ginatukod sa syudad sang Passi kag kabanwahanan sang Zarraga kag Barotac Nuevo.

Ginpahayag sang DPWH 6 nga kon makumpleto ang Zarraga kag Passi By-Pass Roads magahatag ini sang alternatibo nga alagyan sa mga motorista nagikan sa syudad sang Iloilo padulong sa mga probinsiya sang Aklan kag Capiz bangud indi na mag-agi sa bahin sang Poblacion, magapalip-ot sang travel time kag mabuhinan ang trapiko sa banwa ukon city proper.

Samtang ang Barotac Nuevo By-Pass Road magahatag sang alternatibo nga alagyan sa nanuhaytuhay nga mga destinasyon sang mga turista kag kabanwahanan sa norte nga bahin sang probinsya sang Iloilo.

Suno kay DPWH 6 Director Regional Wenceslao M. Leaño, Jr. sa press report sang ahensiya nga ang konstruksyon sang P229.183 ka milyon nga By-Pass Road sa Passi City gina-implementar sa duha ka bahin. 

READ:  Hiligaynon News: Libre nga TESDA assessment ginpatigayon sa Capiz

Ginasakop sang Phase 1 ang nagapadayon sa karon nga pagtukod sang 6 ka span, 30-mm Pre-Stressed Concrete Type IV-B Girder Bridge on Bored Pile Foundation kalakip ang approaches kag slope protection sa balor nga P125.584 milyon. 

Ang Phase 2 sang proyekto nga nagabalor P103.59 ka milyon magabukas sang 4-lane nga bag-o nga dalan nga may kalabaon nga 2.817 kilometros kag kalaparon nga 20.0 metros sa diin ang duha ka lane nga may kalabaon nga 0.857 kilometros ang iga-konkreto sang Portland Concrete Cement Pavement (PCCP) nga may kalaparon nga 3.35-metros kalakip ang slope protection kag mga cross drain. 

Ang pagtukod sang Barotac Nuevo By-Pass Road-Jct. Iloilo East Coast-Capiz Road sa balor nga P109.698 ka milyon nagalakip sang pagbukas sang 1.75-kilometer, 4-lane nga bag-o nga dalan nga may 13.40-metros nga kalaparon nga may PCCP kag slope protection. 

Ginalakipan naman ang konstruksyon sang Zarraga By-Pass Road nga nagabalor P100.00 milyon sang pagbukas sang 1.20-kilometros nga bag-o nga dalan, 13.40 ka metros nga kalaparon nga PCCP  kag may slope protection. (JBG/laf/PIA6-Iloilo)

Source: PIA Feed