Hiligaynon News: DTI nag-imbitar sang media sa ila ginpabaskog nga pagbantay sang presyo ka mga balaklon

SYUDAD SANG ILOILO. Septyembre 14 (PIA6) – Ang Department of Trade and Industry (DTI)-Iloilo nag-imbitar sang mga local nga media, kaupod man ang Philippine Information Agency, sang pag-monitor sa isa ka mayor nga supermarket sa ciudad sang Iloilo para matan-aw kung nagapati man ang establesimiento sa suggested retail prices sang mga balaklon.

Ang provincial director sang DTI nga si Diosdado Cadena, Jr. naghambal nga ginapabaskog nila ang pag-monitor sang presyo sang mga basic kag prime commodities nga ara sa idalom sang DTI tungod sa inflation.

Ang gina-ubra sang DTI nga pag-monitor parte sa validation para mapaathag kag maipahibalo sa publiko kon ano man gid ang gakalatabo sa presyo sang balaklon.

Nalain-lain nga mga produkto ang gintan-aw sang monitoring team sang DTI kapareho sang canned fish kag marine products, processed milk, kape kag canned beef.  

Pagkatapos sang inspeksyon, nahibaluan nga kumpleto ang “shelfing” sang supermarket kag indi overpriced ang mga nabaligya nga mga commodities.

Ang mga kunsumidor kag publiko pwede maka-report sang mga kaso sang pagpasobra nga pasaka sang presyo ka balaklon.

READ:  MSU-Main classes push through amid conflict

Pwede makasulat, tawag, ukon e-mail sa DTI bahin sa reklamo sang pagpasobra sang presyo, basta ibutang lang nila ila nga ngalan, ngalan sang establesimiento, ang oras sang nakit-an ukon natabo nga pag overprice, kag ang produkto.  

Ang mga detalye dapat kumpleto man, suno kay Cadena, para ma-aksyonan kag mahatagan sang naga-kaangay nga penalidad ang mga establesimiento nga nagbayolar.  

Ang dugang pa ni Cadena, may mga commodities nga indi sa idalom sang pagbantay sang DTI, pero nagabulig man sa gihapon ini sa mga nalain-lain nga mga ahensya sa pagbantay sang presyohanay sang mga baligya.

Ang pagbantay sang presyo ka mga commodities kapareho sang bugas, mais, dried fish and marine products ara sa idalom sang Department of Agriculture.

Kung firewood kag uling naman ang paga-istoryahan, ang Department of Environment and Natural Resources ang nagabantay sini. (CBA/PIA6)

Source: PIA Feed