Hiligaynon News: Ika-13 nga Negosyo Center sa Capiz natalana pagabuksan

SYUDAD SANG ROXAS, Capiz, Setyembre 27 (PIA) – Natalana nga pagabuksan sang Department of Trade and Industry (DTI) sa bulig sang lokal nga pangluhan sang banwa sang Dumarao ang Negosyo Center subong nga adlaw, Setyembre 27 sa merkado publiko nga edipisyo sang Dumarao.

Ang nasambit nga proyekto ang mangin ika-13 na nga Negosyo Center sa probinsya humalin tuig 2015.

Ang mga nauna nga natukod nga NC ang nahamtang sa Roxas City kag mga kabanwahanan sang Mambusao, Pilar, Pres. Roxas, Sapi-an, Tapaz, Jamindan, Sigma, Dao,  Pontevedra, Panit-an kag Dumalag.

Ginpahayag ni Ermelinda Pollentes nga assistant regional director sang DTI-6 nga ang mga Negosyo Center ang maga-serbe nga extension office sang DTI sa mga kabanwahanan kag sarang man magamit nga lugar agud mapasundayag sang mga kabanwahanan ang ila tagsa ka pinasahi subongman ginapabugal nga mga produkto.

Nahibaluan nga ang pagtukod sang Negosyo Center ang isa sa mga istratehiya sang DTI agud nga labi nga mapasangkad ang mga medium, small and micro enterprises (MSMEs) para maghatag sang trabaho ukon palangabuhian sa mga katawhan.

READ:  Mga residente ng San Fernando, nakibahagi sa EMB ‘Refill Revolution’

Ang pagtukod sang Center ang sandig sa sa Republic Act No. 10644 ukon ang “Go Negosyo Act” nga gin-sponsor ni Senador Paolo Benigno “Bam” Aquino IV agud nga mapadali ang pagtukod sang negosyo sa pungsod. (AAL/PIA Capiz)

Source: PIA Feed