Hiligaynon News: Mga kadalag-an sa siyensya kag teknolohiya gamiton sa sektor sang aquaculture

SYUDAD SANG ROXAS, Capiz, Setyembre 14 (PIA) – Ginpahayag ni Rowen Gelonga nga direktor sang Department of Science and Technology (DOST) – 6 nga lubos nga pabakuron ang pangisda kag aquaculture nga palangabuhian sa rehiyon pinaagi sa bulig sang siyensya kag teknolohiya.

Ang bulig sa aquaculture nga sektor ang kaangot sa prayoridad sang DOST nga mapabatyag kag makabenepisyo ang mga pumoluyo sa bunga sang mga pagtuon sa Sicence and Technology (S & T).

Gindugang pa ni Gelonga nga nakapakig-angot na ang DOST sa University of the Philippines Visayas kag Southeast Asia Fisheries Development Corporation (SEAFDEC) agud hingyuon nga ila ipaambit ang nadihon nga mga teknolohiya para sa pagpasanyog sang aquaculture kag pangisda nga sektor sa rehiyon.

Samtang ginpahayag ni Gelonga nga ang Capiz State University (CAPSU) ang nagabulig man sa DOST sa katuyuan nga mapabakod ang Research and Development subongman consultancy program para sa aquaculture sang ahensya.

Nahibaluan nga may mga propesor sang CAPSU ang gin-deploy sa mga sangha para sa “technology transfer” ukon libre nga pagbulig sa mga tag-iya sang sangha nga mapataas ang ila produksyon.

READ:  Livelihood groups in Ozamiz get financial aid from DSWD

Kalakip man sa mga inisyatibo para sa sektor sang aquaculture amo ang Fisheries and Food R & D Center sa CAPSU nga magatutok sa pagdihon sang mga teknolohiya para sa pangisda kag na-proseso nga pagkaon nagikan sa kalalawran kag mga punong.

Subongman nagpatigayon sang pagtalakay sa aquaculture kag mga seafood nga produtko ang DOST sa bulig sang CAPSU agud lubos pa gid nga mapabakod ang pagkilala sa probinsya bilang Seafood Capital sang Pilipinas.

Dugang pa sa mga programa para sa pagpasanyog sang aquaculture sa rehiyon amo ang Mollusk R & D Center sang UPV nga magatuon sa mga “mollusk” kapareho sang talaba, tahong, lukos, diwal kag madamo nga iban pa.

Ang Western Visayas nga rehiyon ang isa sa mga lugar sa pungsod nga may manggaranon nga “fishing ground” kag ini man ang isa sa major player sang aquamarine nga industriya sang pungsod. (AAL/PIA Capiz)

Source: PIA Feed