Hiligaynon News: P41.77M para sa PDRRM Opcen aprubado

SYUDAD SANG ROXAS, Capiz, Hulyo 13 (PIA) – Aprubado sang Provincial Disaster Risk Reduction and Management Council sang Capiz ang masobra PhP41.77 milyones nga pundo para sa pagsugod sa pagpaobra sang emergency operation center sang probinsya.

Sa tingub nga ginhiwat nga sinapol sang PDRRMC, Provincial Peace and Order Council akg Provincial Anti-Drug Abuse Council nga ginpangunahan ni Governor Antonio Del Rosario sining karon lang, gin-aprobahan sang grupo ang nasambit nga pundo gikan sa PDRRM trust fund sang nagliligad nga tuig.

Ginpahayag sang Gobernador nga ang nasambit nga tatlo ka panalgan nga PDRRM operation center nga edipesyo ang igapatukod sa ESLA sa Lanot, Roxas City, sa diin, ang kabiligan nga kinahanglanon nga pundo ang nagalab-ot sa PhP45 milyones.

Suno pa sa iya nga pinaagi sa pagpatukod sini, sarang nga maakomodar ang mga pasilidad kag kagamitan para sa emerhensya subong sang mga ambulansya, dump truck kag iban pa, maluwas nga may lugar para sa mga nagarespondi sa mga emerhencya.

READ:  IFARMC summit 2018 held in Lucena City

Sandig sa Republic Act 10121, ginamando sa tanan nga mga lokal nga DRRMC lakip na sa probinsya, syudad, munisipyo ukon barangay ang pagpahamtang o pagtukod sang ila tagsa  ka DRRM operation center.

Dako naman ang pagpasalamat ni Provincial DRRM Officer Esperedion Pelaez sa Konseho ilabi na kay Governor Del Rosario sa paghatag prayuridad sa sini nga kinahanglanon sang probinsya. (JBG/PIA6-Capiz)

 

Source: PIA Feed