Hiligaynon News: Trade expo nagapadayon sa Roxas City

SYUDAD SANG ROXAS, Capiz, Hulyo 15 (PIA) — Ginhiwat ang trade expo sa Robinsons Place diri sa syudad sang Roxas kaangot sa Micro, Small and Medium Enterprises (MSME) Week nga selebrasyon para sa karon nga tuig.

Ginpahayag ni Ken Cuñada nga officer-in-charge provincial director sang Department of Trade and Industry (DTI) – Capiz nga 59 ka mga exhibitors nagikan sa mga sektor sang ginaproseso nga pagkaon, handicraft kag horticulture ang nagapasakop sa apat ka adlaw nga baligyaanay subongman pagpakilala sang mga produkto kag serbisyo sa mga mall goer ukon publiko.

Nagpasakop man sa nasambit nga hilikuton ang pila ka mga Agrarian Reform Communities kag Shared Service Facility (SSF) cooperators.

Ang trade expo ang isa sa mga inisyatibo sang DTI agud labi pa gid nga mapasangkad ang bulig sa mga MSME ukon magamay nga mga negosyante agud nga matagaan sang katumanan ang oportunidad para sa mas madamo nga trabaho kag mapanubo ang kaimulon sa mga komunidad.

READ:  Local contractors can join Marawi rehab projects

Subongman ang trade expo nga isa sa mga highlight sang MSME Week celebration ang ginapatigayon pinaagi sa kooperasyon sa DTI sang lokal nga panguluhan sang Roxas City kag probinsya sang Capiz, Provincial Micro, Small & Medium Enterprise Development Council kag mga Negosyo Center.  (AAL/PIA Capiz)

Source: PIA Feed