Ilokano News: Nagannak kadagiti immawat ti SPES, nagseminar

LAOAG CITY, Hunio 5 (PIA) – Nairaman a nagseminar dagiti nagannak ken “guardian” dagiti immawat ti Special Program for the Employment of Students (SPES) iti Ilocos Norte tapno mailawlawag kadakuada ti pagalagadan ti nasao a programa.

 

Naisayangkat daytoy a seminar sakbay a maideploy dagiti ubbing kadagiti naduma-duma nga opisina ti kapitolio pakairamanan dagiti Local Government Units (LGUs).

 

Segun kenni Lizette Bitancor-Atuan, agdama a hepe ti Public Employment and Service Office (PESO) iti Ilocos Norte, adda tallo gasut nga ubbing iti probinsia nga umawat ti SPES ita a bakasion.

 

“Immunan a naideploy ti 245 nga estudiante nga immawat ti SPES idi May 14, ken agserbi dagitoy iti uneg ti duapulo nga aldaw,” kinuna ni Atuan.

 

Kabayatanna, maragsakan ni Delia Recaidos iti Barangay 34-A Gabu Norte, Laoag City gapu ta maysa ti apokona a ni Lean Joy Barcellanos nga umawat ti SPES ita a tawen.

 

Kinunana a daytoyen iti maikadua a gundaway nga umawat ti SPES ti apokona, a sumrek iti Grade-12 iti umay a panaglulukat ti klase.

READ:  DAR, LGU ink MOA for 'LinkSFarM' Project in AgSur

 

Pagbinnuligan ti Department of Labor and Employment (DOLE) ken ti gobierno ti Ilocos Norte ti pannakayimplementar ti SPES iti probinsia.

 

Kinuna ni Atuan a pagbingayan ti DOLE ken ti gobierno probinsial ti Ilocos Norte ti sueldo para ti SPES nga aggatad ti P450.00 tunggal aldaw, nga ti gobierno ti Ilocos Norte ti mangted ti innem a pulo a porsiento ken bagi met ti DOLE ti uppat a pulo a porsiento.

 

Ididiaya ti gobierno ti Ilocos Norte babaen ken ni Gobernador Imee Marcos ti SPES program tapno adda pagsapulan dagiti estudiante ken out of school youth (OSY) kabayatan ti bakasion. (FGL/CJDG/PIA1-Ilocos Norte)

Source: PIA Feed