Kinaray-a News: Antique maga-selebrar kang Environment Month, Pista kang Kagubatan

SAN JOSE, Antique, Hunyo 13 (PIA) – –  Ang Probinsya kang Antique nagapakigbuylog sa iba pa nga komunidad sa aton pungsod sa pag selebrar ‘Environment Month’ nga nabase sa Presidential Proclamation No. 237 series of 1998 sa tema nga “Beat Plastic Pollution”.

Bilang suporta sa amo nga seleberasyon, ang Provincial Board of Antique nagpasar man ka sangka ordinansa nga naga deklarar kang katapusan nga Biernes sa bulan kang Hunyo kada tuig nga Pista kang Kagubatan kag nagapanawagan sa tuigan nga pagpananun kang kahoy sa mga  ‘major watershed areas’ sa mga kalbo run nga bukid kag paghiwat kang kampanya sa pagprotektar kang aton palibot.

Sa meeting kasan-o gid lamang nga ginhiwat kang Municipal Environment and Natural Resources Officers (MENRO) nga ginpatigayon nanday ENRO Vivian T. Marfil, ang kada munisipyo nagsugot nga maghiwat kang pagpanglimpyo sa mga suba, sapa, kanal kag binit baybayon bilang kabahin sa selebrasyon kang Environment Month.

“Ang mga pomoloyo ginahinyu sa pag-entra sa pagpanglimpyo para madugangan pa gid ang anda pag-intinde kang anda responsibilidad sa pagdumara kang andang basura. Ang pagpamatok sa paggamit kang plastik dapat maga umpisa sa panimalay, hambal ni Barillo.

READ:  CRDRRMC calls for stronger collaboration for disaster- resilient communities

Para sa Pista kang Kagubatan, may pagahiwaton nga pagpananum kang kahoy sa  Barangay Aningalan, San Remigio sa Hunyo 29 nga pangunahan kang ENRO kag mga empleyado kang gobierno probinsyal, ang mga ahensya kang gobyerno gina imbitar man sa pag entra.

Sa pihak nga bahin si  Provincial Environment and Natural Resources Officer Andres Untal ka DENR  kaimaw sanday Community Environment and Natural Resources Officer Louie Laud kag Cynthia Blancia kang  Belison  kag Culasi nagtambong sa amo nga miting kang mga MENRO sapagpa-alinton kang mga programa kag serbisyo ng ginapatuman kang DENR.  

Hambal ni Untal ang pagbuligay kang DENR kag mga MENRO makapasanyog sa pagpatuman kang mga layi nga naga protektar sa aton palibot. Gani may masunod pa nga mga paghinun-anon nga pagahimu-on para mapa-alinton pa gid kananda ang mga importante nga layi nga ginapatuman kaimaw ang mga lokal nga pamunu-an. (JSC/PSM/PIA Antique)

Source: PIA Feed